.png)
Image: FireFox
काठमाडौं । मोजिलाले फायरफक्स वेब ब्राउजरको नयाँ डिजाइन सार्वजनिक गरेको छ। कम्पनीले डेस्कटप र मोबाइल दुवै उपकरणमा प्रयोग हुने फायरफक्सको नयाँ डिजाइनलाई फायरफक्स १५७ सँगै सबै प्रयोगकर्ताका लागि उपलब्ध गराएको हो।
मोजिलाका अनुसार पछिल्लो एक वर्षमा फायरफक्समा प्रयोगकर्ताको ब्राउजिङ अनुभव सहज बनाउने उद्देश्यले विभिन्न नयाँ सुविधा थपिएका छन्। एउटै पर्दामा दुईवटा पृष्ठ हेर्न मिल्ने सुविधा, ब्राउजरमै समावेश गरिएको भर्चुअल निजी सञ्जाल, वेबसाइटमा प्रयोगकर्तालाई पछ्याउने प्रणाली रोक्ने सुविधा तथा कृत्रिम बुद्धिमत्ताको प्रयोगसम्बन्धी थप नियन्त्रण यसै क्रममा थपिएका हुन्।
नयाँ डिजाइन सार्वजनिक गर्नुअघि मोजिलाले केही महिनासम्म ‘नाइट्ली’ संस्करणमार्फत प्रयोगकर्ताबाट प्रतिक्रिया लिएको थियो। प्राप्त प्रतिक्रियाका आधारमा डिजाइनमा आवश्यक सुधार गरेपछि अहिले सबै प्रयोगकर्ताका लागि नयाँ रूप सार्वजनिक गरिएको कम्पनीले जनाएको छ।
मोजिलाले नयाँ डिजाइन तयार गर्दा फायरफक्सलाई आधुनिक देखिने तर अन्य ब्राउजरजस्तो सामान्य नदेखिने उद्देश्य राखेको जनाएको छ।
नयाँ डिजाइनमा ब्राउजरका रङ, चिन्ह र विषयवस्तुमा परिवर्तन गरिएको छ। दैनिक प्रयोग हुने ट्याब र उपकरणपट्टीदेखि नयाँ ट्याब पृष्ठ तथा निजी ब्राउजिङको स्वरूपसम्ममा नयाँ डिजाइन लागू गरिएको छ।
मोजिलाका अनुसार नयाँ स्वरूप तयार गर्दा ब्राउजरको कार्यक्षमतामा असर नपर्ने गरी डिजाइन परिवर्तन गरिएको छ।
डेस्कटप र मोबाइलमा समान डिजाइन शैली प्रयोग गरिएकाले फायरफक्सका आगामी सुविधा र अनुभवलाई एउटै आधारमा विकास गर्न सहज हुने कम्पनीको भनाइ छ।
नयाँ डिजाइनसँगै प्रयोगकर्ताले ब्राउजरको स्वरूप र काम गर्ने तरिका आफूअनुसार मिलाउन थप विकल्प पाउने भएका छन्।
प्रयोगकर्ताको मागपछि ‘कम्प्याक्ट मोड’ पुनः ल्याइएको छ। यसले ट्याब र उपकरणपट्टीको आकार घटाउँछ, जसका कारण पर्दाको बढी भाग वेबसाइटका लागि प्रयोग गर्न सकिन्छ।
सानो पर्दा भएका उपकरणका लागि स्वतः कम्प्याक्ट हुने विकल्पसमेत राखिएको छ।
फायरफक्समा नयाँ विषयवस्तु छनोट गर्ने सुविधा पनि थपिएको छ। नयाँ विषयवस्तु छनोट गर्ने व्यवस्थामार्फत प्रयोगकर्ताले ब्राउजरको स्वरूप आफूलाई मनपर्ने ढाँचामा परिवर्तन गर्न सक्नेछन्।
नयाँ ट्याब पृष्ठलाई पनि प्रयोगकर्ताले आफूअनुसार व्यवस्थित गर्न सक्नेछन्। नियमित रूपमा प्रयोग गर्ने वेबसाइटलाई नयाँ ट्याब पृष्ठमा स्थायी रूपमा राख्न सकिने सुविधा थपिएको छ।
मोजिलाले नयाँ डिजाइन सार्वजनिक गरे पनि फायरफक्सका आधारभूत विशेषता भने यथावत् रहने जनाएको छ।
कम्पनीका अनुसार फायरफक्स स्वतन्त्र र खुला स्रोतमा आधारित ब्राउजरका रूपमा कायम रहनेछ। ब्राउजरमै गोपनीयता सुरक्षाका विभिन्न व्यवस्था राखिएका छन् भने प्रयोगकर्तालाई ब्राउजर कसरी सञ्चालन गर्ने भन्ने विषयमा थप नियन्त्रण दिइएको छ।
कृत्रिम बुद्धिमत्तासम्बन्धी सुविधामा पनि प्रयोगकर्ताले आफूलाई आवश्यक विकल्प छनोट गर्न सक्ने व्यवस्था रहेको मोजिलाले जनाएको छ। कुन कृत्रिम बुद्धिमत्ता सुविधा प्रयोग गर्ने, कुन प्रणाली छनोट गर्ने र त्यसले कस्तो जानकारी प्रयोग गर्न पाउने भन्ने विषयमा प्रयोगकर्ताले नियन्त्रण गर्न सक्ने कम्पनीको भनाइ छ।
मोजिलाले नयाँ डिजाइनलाई फायरफक्सको आधारभूत पहिचान परिवर्तन गर्नेभन्दा पनि त्यसलाई नयाँ स्वरूपमा अघि बढाउने प्रयासका रूपमा प्रस्तुत गरेको छ।
फायरफक्स १५७ मार्फत डेस्कटप र मोबाइल दुवैमा नयाँ डिजाइन उपलब्ध भएसँगै प्रयोगकर्ताले नयाँ स्वरूप प्रयोग गर्न सक्नेछन्।
